बैतडी । बैतडीमा अर्का एक निर्वाचन प्रहरीको पनि मृत्यु भएको छ । सोमबार निर्वाचन प्रहरी मेलौली नगरपालिका–६, बैतडीका ३८ वर्षीय राजेन्द्र प्रसाद भट्टको मृत्यु भएको हो ।
यससँगै बैतडीमा एक महिनामै मृत्यु हुने निर्वाचन प्रहरीको संख्या तीन पुगेको छ । जिल्ला प्रहरी कार्यालय बैतडीका अनुसार भट्ट इलाका प्रहरी कार्यालय मेलौलीमा कार्यरत थिए । सोमबार साँझ ड्युटी सकेर घर फर्किएका उनी घरमै एक्कासी बेहोस भएर ढलेका थिए ।
उपचारका लागि केशरपुर प्राथमिक स्वास्थ्य केन्द्र पुर्याउँदा डाक्टरले मध्यराति १२ बजेर ५ मिनेटमा मृत घोषणा गरेको प्रहरीले जनाएको छ । बैतडीमा यसअघि दुई निर्वाचन प्रहरीको मृत्यु भएको थियो ।
फागुन ८ गते दशरथचन्द नगरपालिका–४ बबेत घर भएका ३८ वर्षीय महादेव वडको मृत्यु भएको थियो । उनी पनि घरमै अचेत भएर ढलेका थिए । त्यसैगरी गत माघ २० गते दशरथचन्द नगरपालिका–४ का ३२ वर्षीय प्रकाश चन्दको तालिम सकेर फर्किने क्रममा भिरबाट लडेर मृत्यु भएको थियो ।
