भक्तपुर । भक्तपुरको गठ्ठाघरमा आज भएको सडक दुर्घट्नामा मृत्यु हुनेको पहिचान खुलेको छ । दिउँसो दुुई वजे गठ्ठाघर चौकमा ना ६ ख २१७३ नम्बरको ट्रकले ट्राफिक जाँचका क्रममा रोकिएको बा ३९ प ८९४४ नम्बरको स्कुटरलाई ठक्कर दिँदा चालक महिलाको घटनास्थलमै मृत्यु भएको थियो ।
मृत्युु हुनेमा दोलखाको मेलुङ–४ घर भई काठमाडौँको बागबजार बस्ने २३ वर्षकी सुष्मा नेपाली रहेको प्रहरीले जनाएको छ । ट्रक चालक भने अझै फरार रहेको र उनको खोजीकार्य भइरहेको प्रहरीले जनाएको छ ।
कौशलटारबाट गठ्ठाघरतर्फ आइरहेको ट्रकले ट्राफिक जाँचमा रोकिराखेको स्कुटरलाई ठक्कर दिँदा सो दुर्घट्ना भएको हो । तीव्र गतिको ट्रकले करिब एक सय मिटर परसम्म स्कुटरलाई घिसारेको प्रत्यक्षदर्शीले बताएका छन्।
स्कुटर चालकको शरीर क्षतविक्षत अवस्थामा निकालेर पोष्टमार्टमका लागि शिक्षण अस्पताल महाराजगञ्ज लगिएको छ । दुर्घटनापछि आक्रोशित भीडले ट्रकमा तोडफोड गरेपछि प्रहरीले अश्रुुग्याँस प्रहार गरेर भिड तितरवितर गरेको थियो ।
