अछाम । गोठमा आगो लाग्दा अछाममा दुई बालबालिकाको ज्यान गएको छ । जिल्लाको मेल्लेख गाउँस्थित एउटा गोठमा खेलिरहेका दुई बालबालिकाको बुधवारसाँझ आगलागीमा परेर मृत्यु भएको हो ।
प्रहरीका अनुसार, जिल्लाको मेल्लेख गाउँपालिका–३ ठाटी दर्बाका जयबहादुर बुढा र झङ्करे बुढाको खरले छाएको गोठमा आगलागी हुँदा छ वर्षीया निरुता बुढा र तीन वर्षीय अङ्कित बुढाको मृत्यु भएको हो । दुवै बालबालिकाको शव जलेको गोठबाट निकालेर पोष्टमार्टमका लागि अस्पताल पठाइएको छ।
