भक्तपुर । भक्तपुरमा बसको ठक्करबाट एक जनाको मृत्यु भएको छ । भक्तपुर नगरपालिका वडा नम्बर ६ डेकोचामा व्यासीबाट कमलविनायक जाँदै गरेको बसले ठक्कर दिँदा एक जनाको मृत्यु भएको जिल्ला प्रहरी परिसर भक्तपुरले जनाएको छ ।
मंगलबार राति पौने ९ बजे बागमती ३ ख ५०८० नम्बरको बसले अचानक एक पुरूषलाई ठक्कर दिएको थियो । ठक्करबाट गम्भीर घाइते भएका पुरूषलाई भक्तपुर अस्पताल लगिएको थियो। त्यहाँ उपचारको क्रममा राति नै मृत्यु भएको हो । पहिचान नखुलेको शव सोही अस्पतालमा राखिएको छ ।
बस चालक मकवानपुर हेटौंडा उपमहानगरपालिका वडा नम्बर १० घर भई भक्तपुर आदर्श बस्ने ४५ वर्षीय अहमद हुसेनलाई प्रहरीले पक्राउ गरेको छ ।
