भक्तपुर । सूर्यविनायक नगरपालिकाले शिक्षा क्षेत्रको सुधारका लागि २८ करोड ३६ लाख ३७ हजार रुपैयाँ छुट्याएको छ । नगरपालिकाले आगामी आर्थिक वर्षमा शैक्षिक क्षेत्रका भौतिक संसचना साथसाथै अन्य आवश्यकता पुरा गर्नका लागि सो बराबरको बजेट विनियोजन गरेको हो ।
नगरपालिकाले आगामी आर्थिक वर्षमा विद्यार्थीसँग जीवनोपयोगी सीप कार्यक्रमका लागि १५ लाख रुपैयाँ विनियोजन गरेको छ । त्यस्तै, पूर्व प्राथमिक शिक्षा भौतिक सुधारका लागि १० लाख रुपैयाँ नगरपालिकाले छुट्याएको छ । र, राष्ट्रपति रनिङ शिल्ड खेलकुद सञ्चालनका लागि २० लाख रुपैयाँ र अन्य शैक्षिक गतिविधिसमेतलाई गरि नगरपालिकाले २८ करोड ३६ लाख ३७ हजार रुपैयाँ विनियोजन गरेको हो ।
आगामी आर्थिक वर्षमा नगरपालिकाले दिवा खाजालाई थप प्रभावकारी बनाउने लक्ष्य लिएको छ । विद्यार्थीलाई पोषणयुक्त खाना उपलब्ध गराउनका लागि प्रत्येक विद्यालयमा एक–एक वटा करेसाबरी निर्माणका लागि समेत बजेट छुट्याइएको सूर्यविनायक नगरपालिकाका उपप्रमुख सरिता तिम्सिना भट्टराईले बताइन् । सामुदायिक विद्यालयको भौतिक, प्राविधिक तथा संस्थागत सुधार गर्नका लागि निजी क्षेत्रका जस्तै व्यवस्थापकीय कौशल भएका मानिसहरुलाई अवसर दिइने समेत उनले बताइन् ।
एसईई दिएर बसेका विद्यार्थीहरुलाई आगामी दिनहरुमा केकस्तो विषय पढ्ने भन्नेबारे जानकारीका लागि नगरपालिकाले शैक्षिक मेला समेत आयोजना गर्ने योजना बनाएको । विद्यार्थी साथसाथै शिक्षक र विद्यालयका अन्य कर्मचारीहरुको सिप वृद्धिका लागि समेत तालिमको आयोजना गरिने उनले बताइन् ।
विद्यालयस्तरबाटै प्राविधिक शिक्षा दिनका लागि नगरपालिकाले आवस्यक जनशशक्ति र पूर्वाधारको व्यवस्था गर्ने भएको छ । त्यससँगै, वैदिक विद्यालयको अवधारणालाई समेत नगरपालिकाले प्राथमिकतामा राखेको छ । विद्यालय क्षेत्रलाई सुरक्षित बनाउन सिसिटिभि, विद्यार्थीको शारीरिक तथा मानवीय विकासका लागि स्काउटिङ शिक्षा आदिका लागि पनि नगरपालिकाले सहयोग गर्ने लक्ष्य राखिएको नगरपालिकाकी उपप्रमुख सरिता तिम्सिना भट्टराईले बताइन् ।
बालबालिका साथसाथै युवाहरुको सामाजिक विकासका लागि नगरपालिकाले युवा नीति निर्माण, युवा सम्मेलन, युवा खेलकुद लगायतका क्षेत्रमा बजेट विनियोजन गरेको छ ।
