काठमाडौं । प्याराग्लाइडिङ उडानमा लगाइएको एकद्वार प्रणालीको प्रावधान हटेपछि पोखराको प्याराग्लाइडिङ उडानको शुल्क घटेको छ । मङ्सिरसम्म उडानको १२ हजार रुपैयाँ लिँदै आएका पोखराका प्याराग्लाइडिङ कम्पनी अहिले तीनदेखि चार हजार रुपैयाँमा उडान गरिरहेका हुन् ।
प्याराग्लाइडिङ व्यवसायीबिचको विवादले खुला प्रणालीमा गएपछि उडान शुल्क ७५ प्रतिशतसम्म घटेको हो । गएको मङ्सिर अन्तिम साता २१ कम्पनीले उडानमा खुला प्रणाली माग्दै व्यवसायीको छाता संस्था नेपाल हवाई खेलकुद संस्था (ना) मा निवेदन दिएका थिए ।
व्यवसायीको मागबमोजिम खुला प्रणालीमा जाने निर्णय लिएपछि बढेको विवादले दुई साता उडान नै ठप्प बनेको थियो । नियमनकारी निकाय नेपाल नागरिक उड्डयन प्राधिकरण (क्यान) मा व्यवसायी आफैँले मूल्य तोकेर उडान गर्न सहमत जुटेपछि पुस १५ देखि फेरि उडान सुरु भएको थियो ।
