काठमाडौं । नेपाली कांग्रेसको विशेष महाधिवेशन पुस २७ गतेदेखि सुरु हुने भएपछि राजधानी काठमाडौंको भृकुटीमण्डपमा तयारी कार्य तिब्र गतिको साथ अघि बढाइएको छ । मञ्च निर्माणदेखि हल सजावट, ध्वनि–प्रकाश व्यवस्थापन, प्रवेश नियन्त्रण र प्राविधिक संरचना निर्माणका कामहरू एकसाथ तीव्र रूपमा भइरहेको आयोजकले जनाएको छ ।
आयोजकका अनुसार आजै अथवा भोलि बिहानसम्म सम्पूर्ण भौतिक तयारी सम्पन्न गर्ने लक्ष्यसहित काम अन्तिम चरणमा पुगेको छ । विशेष महाधिवेशनलाई व्यवस्थित, अनुशासित र भव्य रूपमा सम्पन्न गर्ने उद्देश्यले सबै संयन्त्रलाई सक्रिय बनाइएको छ ।
अनामनगरस्थित सिंहदरबारको पूर्वी गेट नजिकै स्थापना गरिएको विशेष महाधिवेशन सचिवालयको प्रत्यक्ष समन्वयमा तयारी अघि बढाइएको छ । सचिवालयमार्फत स्वयंसेवक व्यवस्थापन, सुरक्षा समन्वय, अतिथि सत्कार, प्रचार–प्रसार, मञ्च तथा प्राविधिक व्यवस्थापनजस्ता उपसमितिहरू क्रियाशील छन् । प्रत्येक उपसमितिलाई स्पष्ट कार्ययोजना र समयसीमा तोकिएको महाधिवेशन व्यवस्थापन समितिले जनाएको छ ।
एक हजार स्वयंसेवक परिचालन स्वयंसेवक व्यवस्थापन समितिका संयोजक मनिष कोइरालाका अनुसार करिब एक हजार स्वयंसेवक परिचालन गरिनेछ । उनीहरूलाई प्रवेश व्यवस्थापन, प्रतिनिधि सहजीकरण, हल व्यवस्थापन, सूचना प्रवाह तथा आकस्मिक सहयोगका क्षेत्रमा खटाइनेछ ।
“भृकुटीमण्डपमा मुख्य मञ्च निर्माण सुरु भइसकेको छ । हल सजावट, ब्यानर, पार्टी झन्डा, साउण्ड सिस्टम र बत्ती जडानको काम पनि सँगसँगै भइरहेको छ,” कोइरालाले जानकारी दिए ।
महामन्त्रीद्वयको सक्रिय नेतृत्व विशेष महाधिवेशन नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माको प्रत्यक्ष पहल र संलग्नतामा आह्वान गरिएको हो । पार्टीभित्र विधान कार्यान्वयन, आन्तरिक लोकतन्त्र र नेतृत्वको भूमिकाबारे उठेका प्रश्नहरूको सन्दर्भमा यस विशेष महाधिवेशनलाई निर्णायक मानिएको छ ।
महाधिवेशन सफल पार्न महामन्त्रीद्वयले विभिन्न समिति र पार्टी नेताहरूसँग निरन्तर समन्वय गरिरहेका छन् । तयारी प्रक्रियामा उनीहरूको सक्रिय उपस्थितिले कार्यकर्तामा उत्साह थपिएको आयोजक पक्षको भनाइ छ ।
उपत्यकाभर प्रचार–प्रसार तीव्र महाधिवेशनलाई लक्षित गर्दै काठमाडौं उपत्यकाका विभिन्न स्थानमा स्वागत गेट निर्माण, पार्टी झन्डा राख्ने तथा फ्लेक्स बोर्ड टाँस्ने काम तीव्र पारिएको छ । दर्जनौँ स्थानमा प्रचार सामग्री राखेर महाधिवेशनको सन्देश कार्यकर्ता र आम नागरिकसम्म पु¥याउने तयारी गरिएको छ ।
प्रतिनिधि सहभागिता र कार्यक्रम संरचना भृकुटीमण्डपमा पुस २७ र २८ गते सञ्चालन हुने विशेष महाधिवेशनमा कुल ४ हजार ७ सय ४३ प्रतिनिधिमध्ये ६० प्रतिशतभन्दा बढीको सहभागिता रहने अनुमान गरिएको छ । दुई दिनसम्म चल्ने महाधिवेशनमा उद्घाटन सत्र, बन्द सत्र र घोषणासभा आयोजना गरिनेछ ।
उद्घाटन सत्रमा महामन्त्रीद्वय थापा र शर्मासहित पार्टीका शीर्ष नेताहरू, प्रभावशाली युवा नेताहरू तथा ‘जेन–जी’ पुस्ताका प्रतिनिधिहरूले सम्बोधन गर्ने कार्यक्रम तय भएको छ ।
जिल्लाबाट कार्यकर्ता काठमाडौंमा महाधिवेशनमा सहभागिताका लागि देशभरका जिल्लाबाट कांग्रेस कार्यकर्ता र शुभेच्छुकहरू काठमाडौं आइरहेका छन् । जनपरिचालन समितिका संयोजक जगदीश नरसिंह केसीका अनुसार उद्घाटन सत्रमा मात्रै करिब ५० हजार कार्यकर्ता तथा शुभेच्छुकको सहभागिता हुने अपेक्षा गरिएको छ ।
“देशभरबाट कार्यकर्ता आउँदैछन् । यो महाधिवेशन पार्टीभित्रका भावना, असन्तुष्टि र अपेक्षा अभिव्यक्त हुने साझा मञ्च बन्नेछ,” केसीले बताए ।
नेपाली कांग्रेसभित्र विकसित आन्तरिक राजनीतिक परिस्थितिका बीच आयोजना हुन लागेको यो विशेष महाधिवेशनले पार्टीको आगामी दिशा, नेतृत्वको भूमिका र संगठनात्मक संरचनाबारे महत्वपूर्ण सन्देश दिने अपेक्षा गरिएको छ ।
