भक्तपुर । भक्तपुरको सूर्यविनायक नगरपालिका–२ बालकोटमा परम्परागत शैलीमा निर्माणाधीन श्री बालकुमारी माता मन्दिर निर्माणका लागि बैशाख १९ गतेदेखि श्रीमद् भागवत सप्ताह ज्ञान महायज्ञ आयोजना गरिने भएको छ । महायज्ञ २६ गतेसम्म चल्नेछ ।
प्राचीन धार्मिक, ऐतिहासिक तथा सांस्कृतिक महत्व बोकेको बालकोटको यस स्थानमा लिच्छवीकालीन ढुङ्गेधारा, फल्चा र कुवा संरक्षण हुँदै आएको छ । स्व.चन्द्रलाल चपल्छें श्रेष्ठको पहलमा सुरु भएको यो पुनःनिर्माण प्रयासलाई निरन्तरता दिँदै हाल विस्तृत गुरुयोजना अनुसार मन्दिर परिसरमा विभिन्न मठ–मन्दिरसहितका संरचना निर्माण कार्य अघि बढाइएको छ ।
२०७१ सालदेखि शुरु भएको संरचना निर्माणमा स्थानीय र प्रदेश सरकारबाट क्रमशः लाखौंको सहयोग प्राप्त हुँदै आएको छ । अहिले निर्माणाधीन मन्दिरको सत्तल निर्माणका लागि सूर्यविनायक नगरपालिकाबाट ५९ लाख र बागमती प्रदेश सरकारबाट २७ लाख विनियोजन भइसकेको छ ।
मन्दिर निर्माणका लागि कलात्मक काठ तथा पित्तल छाना सहितका संरचनाका लागि कुल ३ करोड ५८ लाख रुपियाँको लागत अनुमान गरिएको छ । बजेट अभावका कारण अब सम्पन्न बाँकी कार्यका लागि बालकुमारी मन्दिर तथा फल्चा निर्माणार्थ उपभोक्ता समितिले १५१ सदस्यीय महायज्ञ मूल आयोजक समिति गठन गरी महायज्ञको आयोजना गर्न लागेको हो ।
महायज्ञबाट २ करोड ५० लाख रकम संकलनको लक्ष्य राखिएको छ । संकलित रकमबाट एक वर्षभित्र सम्पूर्ण निर्माण कार्य सम्पन्न गर्ने योजना रहेको समितिका संयोजक इन्जिनियर श्रीराम श्रेष्ठले जानकारी दिए ।
महायज्ञको प्रमुख आकर्षणको रुपमा वृन्दावनबाट आमन्त्रित अन्तर्राष्ट्रिय भागवत प्रवक्ता श्री श्री श्री १००८ महाण्डलेश्वर स्वामी श्री ईश्वर चैतन्यजी महाराजद्वारा कथा वाचन गरिनेछ । कार्यक्रम अन्तर्गत बैशाख १९ गते बिहान कलश यात्रा, दिउँसो १ बजे समुद्घाटन समारोह, बैशाख २५ र २६ गते लक्ष्यवर्तीका प्रज्वलन, सामूहिक ब्रतबन्ध, तुलादान जस्ता धार्मिक विधिहरू समावेश गरिनेछ ।
