भक्तपुर । सूर्यविनायक नगरपालिकाको कार्यालय आजबाट आफ्नै भवनमा स्थानान्तरण भएको छ । आज प्रधानमन्त्री केपी शर्मा ओलीले नवनिर्मित भवनको उद्घाटन गरेसँगै नगरपालिकाले आफ्नै भवनबाट प्रशासकीय सेवा दिन सुरु गरेको हो ।
भवनको उद्घाटन गर्दै प्रधानमन्त्री ओलीले राजतन्त्रका पालामा शासन टिकाउनका लागि मरिमेट्दा विकास राम्ररी हुन नसकेको र लोकतन्त्रयताका विकास निर्माणको गति बेग्लै भएको बताए ।
“अब नेपालमा विकासको क्रममा अगाडी बढेको छ । जो भए पनि विकास भइहाल्छ भन्ने कुरा सही होइन । राम्रो प्रणाली नभईकन विकास हुँदैन । काम गर्ने खालको पार्टी सरकारमा नभएर विकास हुँदैन । देश साँच्चै अप्ठ्यारोमा परेकाले दुई ठुला दलको सहकार्यमा देशलाई एकताबद्ध बनाउँदै सरकारले विकासको अगुवाइ गर्नैछ । सरकार अहिले ढल्यो, भरे ढल्यो भनेर कसैले छाति पिट्नु र बिलौना गर्नुको कुनै विकल्प छैन । नेपाली काँग्रेस र नेकपा (एमाले)ले अब देशलाई स्थिरता दिने संकल्प गरिसकेका छन् । यसमा ढुक्क भए हुन्छ ।”, उनले भने ।
उद्घाटन समाराेहमा बागमती प्रदेशका स्वास्थ्य मन्त्री किरण थापा, केन्द्रीय सांसद दुर्लभ थापा, पूर्वमन्त्री महेश बस्नेत लगायतकाे सहभागीता रहेकाे थियाे ।
कार्यक्रममा नगरपालिकाका वरिष्ठ इन्जिनियर जनक न्याैपानेलाई सम्मानसमेत गरिएकाे थियाे ।
यतिन्जेल सेवा दिँदै आएको कार्यालयको नजिकै बनेको नयाँ भवन बाबुरत्न जेभी कन्स्ट्रक्सन कम्पनीले भ्याटबाहेक २० करोड ४१ लाख ५२ हजार रुपैयाँ बराबर रकममा निर्माण गरेको हाे । भवन पूर्णरुपमा अपाङ्गमैत्री रहेको नगरप्रमुख बासुदेव थापाले बताए ।
६ रोपनी ११ आना २ पैसा ३ दाम क्षेत्रफलमा फैलिएको कार्यालय परिसरमा भवन मात्रै ३ रोपनी एक आनामा बनेको छ । नयाँ भवनमा करिब ५०० सवारी साधन अट्ने दुई तल्लाको बेसमेन्ट पार्किङ रहेको छ ।
नवनिर्मित भवनमा दुईवटा लिफ्ट, ३०० जना अट्ने सेमिनार हल, दुई वटा वैठक कक्ष, एउटा पुस्तकालय र एउटा तालिम कक्ष रहेका छन् । त्यस्तै, ९२ वटा कार्यालय कक्ष साथै स्तनपान कक्षसमेत रहेको छ ।
हाल नगरपालिकाले सेवा सुविधा दिँदै आएको भवनका लागि मासिक १ लाख २० हजार रुपैयाँ भाडा तिर्ने गरेको थियाे । नयाँ भवनबाट नगरबासीलाई सेवा लिन थप सहज हुने थापाले विश्वास व्यक्त गरे ।
