भक्तपुर । भक्तपुरको चाँगुनारायण नगरपालिका–४ खोरियामा खानेपानी आयोजना सम्पन्न गरी उपभोक्तालाई हस्तान्तरण गरिएको छ ।
बागमती प्रदेश सरकारका खानेपानी ऊर्जा तथा सिँचाईमन्त्री श्यामबहादुर खड्काले हिजाे उपभोक्ता समितिलाई आयोजना हस्तान्तरण गरेका हुन् । आयोजनाबाट खोरियाका दुई सय घर लाभाविन्त भएका छन् ।
मन्त्री खड्काले उपभोक्ता समितिका अध्यक्ष ज्ञानेन्द्र तामाङलाई खानेपानीको आयोजना हस्तान्तरण गर्दै बागमती प्रदेश सरकारले एक घर एक धारा अभियान सुरु गरेको बताए ।
बागमती प्रदेशसभा सदस्य सुरेश श्रेष्ठले खोरियामा खानेपानीको समस्या समाधान भएको बताउँदै विभिन्न खानेपानी उपभोक्ता समितिका बेथिति हटाउँदै खानेपानी आयोजना सञ्चालनका लागि मर्मत सम्भार कोष स्थापना गर्नुपर्नेमा जोड दिए ।
बागमती प्रदेशका पूर्वभौतिक योजनामन्त्री कृष्णलाल भँडेल, चाँगुनारायण नगरपालिकाका नगरप्रमुख जीवन खत्री, वडाध्यक्ष रोजबहादुर तामाङ, खानेपानी तथा सरसफाइ डिभिजन कार्यालय प्रमुख लोकबहादुर चौलागाईंले घरघरमा खानेपानीको पहुँच पु¥याउन तीन तहकै सरकारले काम गुर्नपर्ने बताए ।
