काठमाडौं । साफ यू–१७ च्याम्पियनसिपमा नेपालले आज श्रीलंकासँग खेल्दै छ ।
पहिलो खेलमा पाकिस्तानसँग पराजित भएको नेपाल पहिलो जीतको खोजिमा हुने छ । उता श्रीलंका पनि घरेलु टोली भुटानसँग ५–१ गोल अन्तरले पराजित भएको थियो । सेमिफाइनलको यात्रा तय गर्नका लागि नेपालले आज श्रीलंकाविरुद्ध फराकिलो जित निकाल्नु पर्ने छ । साथै आजै हुने भुटान र पाकिस्तानबीचको खेलको नतिजाले पनि प्रभाव पार्ने छ । नेपालले समूह चरणको अन्तिम खेलमा घरेलुटोली भुटानसँग खेल्ने छ ।
थिम्पुमा रहेको चाङ्लिमिथाङ रंगशालामा नेपाल र श्रीलंकाबीचको खेल नेपाली समय अनुसार पौने २ बजे सुरु हुने छ ।
नेपालको प्लेयिङ ११ मा २ परिवर्तन गरिएको छ । पाकिस्तानविरुद्धको खेलमा पहिलो रोजाईमा रहेका पवन पाख्रीन, विज्ञान खड्कालाई बेन्चमा राखिएको छ । उनीहरुको ठाउँमा सविन कुमार लुंगेली र अनुभव पुरीले खेल्ने छन् ।
नेपाली टिम यसप्रकार छ
एकराज विश्वकर्मा, प्रशान्त मोक्तान, जोन विष्ट, सुजन डंगोल, सविन कुमार लुंगेली, सुवास बम (कप्तान), पेम्बा नोर्बु भोटे (गोलकिपर), भुवन कामी, कृष्णबहादुर आले, अनुभव पुरी र निशान्त लावत ।
