काठमाडौं । नेपाल आईसीसीको टी–२० अन्तर्राष्ट्रिय वरियतामा दुई स्थान सुधार गर्दै १४औँ स्थानमा उक्लिएको छ । आईसीसीले शुक्रबार सार्वजनिक गरेको नयाँ वरियताअनुसार नेपालले दुई स्थानको सुधार गरेको हो ।
यसअघि १४ औं स्थानमा रहेको नेदरल्याण्ड्स र १५ औं स्थानमा रहेको नामिबियालाई पछि पार्दै नेपालले एकैपटक १६ औं स्थानबाट १४औँ स्थानमा छलाङ मारेको हो ।
एसियाली खेलकुदअन्तर्गत शुक्रबार जापानको नागोयामा अफगानिस्तानलाई ५ विकेटले पराजित गरेपछि नेपालको वरियतामा सुधार आएको हो ।
अफगानिस्तानले दिएको १०३ रनको लक्ष्य नेपालले १७.२ ओभरमा ५ विकेट गुमाएर पूरा गरेको थियो । बलिङतर्फ कुशल भुर्तेलले ४ र ललित राजवंशीले ३ विकेट लिए । ब्याटिङमा सन्दीप जोराले ३४ तथा रोहित पौडेलले अविजित ३३ रन बनाए ।
नेपालले अब समूह चरणको अन्तिम खेलमा शनिबार आयोजक जापानसँग प्रतिस्पर्धा गर्नेछ ।
