काठमाडौं । पूजा महतोले उत्कृष्ट अविजित अर्धशतक प्रहार गरेपछि नेपालले आईसीसी महिला टी–२० विश्वकप ग्लोबल छनोटमा पहिलो सफलता हात पारेको छ। शनिबार त्रिवि क्रिकेट मैदानमा भएको तेस्रो खेलमा नेपालले जिम्बाबेलाई ६ विकेटले पराजित गरेको हो।
जिम्बाबेले दिएको १३० रनको लक्ष्य नेपालले ३ बल बाँकी रहँदा ४ विकेटको क्षतिमा पूरा गर्यो। पूजा महतोले ५० बल खेल्दै ४ चौका र २ छक्कासहित अविजित ५२ रन बनाइन् भने कप्तान इन्दु बर्माले २२ रनको योगदान दिइन्।
यसअघि टस हारेर पहिले ब्याटिङ गरेको जिम्बाबेले निर्धारित २० ओभरमा ६ विकेट गुमाउँदै १२९ रन जोडेको थियो। जिम्बाबेका तर्फबाट केलिस धलोभुले अविजित ५२ रन बनाइन्। बिलभ्ड बिजाले ३४ तथा मोडेस्टर मुपाचिवाले १४ रन जोडिन्।
नेपालका बलरमध्ये रिया शर्माले २ विकेट लिइन् भने कविता कुँवर, पूजा महतो, सीता रानामगर र रुबिना क्षेत्रीले समान १–१ विकेट हात पारे।
नेपालले अब अन्तिम खेलमा सोमबार स्कटल्यान्डसँग प्रतिस्पर्धा गर्नेछ, जहाँ जित नेपालका लागि अनिवार्य हुनेछ।
