काठमाडौँ । पशुपति क्षेत्र विकास कोष अन्तर्गत श्रीपशुपतिनाथ अमालकोट कचहरीको कार्यालयभित्रै जुवातास खेलिरहेको अवस्थामा सात जना पक्राउ परेका छन् । पक्राउ पर्नेमा पशुपति क्षेत्र विकास कोषका संस्कृति महाशाखा प्रमुख ईश्वरमान भण्डारीसहित सात जना रहेका छन् ।
उनिहरूलाई प्रहरीले शनिबार नगदसहित पक्राउ गरेको हो । महानगरीय प्रहरी वृत्त गौशाखाका प्रमुख प्रहरी नायव उपरीक्षक (डिएसपी) सुकदेव खनालले जुवा खेलिरहेको अवस्थामा सात जनालाई पक्राउ गरिएको पुष्टि गरेका छन् ।
खनालले अभियुक्तमाथि अनुसन्धान कार्य अघि बढाइएको बताउँदै थप अनुसन्धान अघि बढाइएको बताए । शनिबार बिदा भएकाले आइतबारदेखि आवश्यक कानुनी प्रक्रिया अघि बढ्ने उनले बताए ।
यसैबिच, पशुपति क्षेत्र विकास कोषका सदस्य सचिव डा. मिलनकुमार थापाले अमालकोट कचहरीभित्रै जुवातास खेल्नेहरू पक्राउ परेको सूचना आफूले पाएको बताएका छन् । डा. थापाले प्रहरी अनुसन्धान सकिएपछि कोषको कर्मचारी सेवा नियमावलीअनुसार उनीहरूमाथि कारबाही अघि बढाइने प्रस्ट पारे ।
