काठमाडौं । रोयल च्यालेन्जर्स बेंगलुरुले आईपीएल क्रिकेटमा छैटौं जित निकालेको छ । बिहीबार राती सम्पन्न खेलमा बेंगलुरुले राजस्थान रोयल्सलाई ११ रनले पराजित गरेको हो ।
बेंगलुरुले दिएको २०६ रनको लक्ष्य पछ्याएको राजस्थानले २० ओभरमा ९ विकेट गुमाएर १९४ रन मात्र बनाउन सक्यो । राजस्थानका यशश्वी जैसवालले ४९ तथा ध्रुव जुरेलले ४७ रन बनाए । नितिश रानाले २८ रन जाेडे ।
१० ओभरको समाप्तिमा ११३-३ को अवस्थामा रहेकाे राजस्थानले त्यसपछि लय गुमाएको थियो । अन्तिम ३ ओभरमा जितका लागि ४० रन आवश्यक हुँदा १८औं ओभरमा राजस्थानले २२ रन जाेडेकाे थियाे ।
हेजलवूडले १९औं ओभरमा १ रन मात्र दिएर २ विकेट लिएपछि बेंगलुरुको जित पक्का भएको थियो ।बेंगलुरुका लागि जोश हेजलवूडले ४ ओभरमा ३३ रन खर्चंदै ४ विकेट लिए । क्रुनाल पान्ड्याले २ तथा भुवनेश्वर कुमार र यश दयालले समान१ विकेट लिए ।
त्यसअघि टस हारेर ब्याटिङको निम्तो पाएको बेंगलुरुले २० ओभरमा ५ विकेटकाे क्षतिमा २०५ रन बनाएको थियो । बेंगलुरुका विराट कोहलीले ७० तथा देवदत पडिक्कलले ५० रन बनाए । फिलिप साल्टले २३ तथा टिम डेभिडले अविजित २३ रन जाेडे ।
राजस्थानका लागि सन्दीप शर्माले २ विकेट तथा वानिन्दु हसरंगा र जोफ्रा आर्चरले समान १ विकेट लिए । याे जितसँगै ९ खेलमा १२ अंक भएको बेंगलुरु अंकतालिकाकाे तेस्रो स्थानमा उक्लिएको छ । समान खेलमा ४ अंक मात्र जाेड्न सफल राजस्थान आठौं स्थानमा छ ।
