काठमाडौं । युएईमा जारी महिला यु-१९ टी-२० विश्वकपको एसिया क्षेत्र छनोटको आफ्नो तेस्रो खेलमा नेपालले घरेलु टोली युएईविरुद्ध टस हारेको छ । शनिबार युएईको अजमान स्थित द सेभेन स्टेडियममा युएइले टस जितेर पहिले ब्याटिङ गर्ने निर्णय लिएको हो। यो नेपाल र युएई दुवैको तेस्रो खेल हो ।
दुवै टोलीले थाइल्याण्ड र कुवेतमाथि फराकिलो अन्तरले हराएर अपराजित रहेका छन्। त्यसैले विश्वकप छनोटमा यि दुई टोलीबिचको विजेताले बाजी मार्ने सम्भावना बलियो छ ।
नेपालले पहिलो खेलमा थाइल्याण्डलाई ६७ रन र दोस्रोमा कुवेतलाई १ सय ८ रनको फराकिलो अन्तरले पराजित गरेको थियो ।
युएईले पनि पहिलो खेलमा कुवेतलाई १ सय ६ रन दोस्रो खेलमा थाइल्याण्डलाई ७४ रनले पराजित गर्दै राम्रो सुरुवात गरेको थियो ।
२९ कात्तिकसम्म चल्ने प्रतियोगितामा नेपाल, घरेलु टोली युएइ, कुवेत र थाइल्याण्ड सहभागी रहेका छन्। नेपालको चौथो खेल २५ कात्तिकमा थाइल्यान्डसँग खेल्नेछ ।
डबल राउन्ड रोविनका आधारमा जारी प्रतियोगितामा पाँचौं खेलमा कात्तिक २७ गते कुवेतसँग खेल्दा अन्तिम खेलमा २८ कात्तिकमा नेपालले युएइको सामना गर्नेछ ।
छनोटको शीर्ष टोली अर्को वर्ष मलेसियामा हुने टी-२० विश्वकपका लागि छनोट हुनेछ ।
