काठमाडौं । कर्णाली प्रदेशका मुख्यमन्त्री यामलाल कँडेलले विश्वासको मत पाएका छन् । आज (सोमबार) बसेको प्रदेशसभा बैठकमा मुख्यमन्त्री कँडेलले विश्वासको मत मागेका थिए ।
उनलाई एमाले र कांग्रेसका २३ सांसदले विश्वासको मत दिएका हुन् । संविधानको धारा १८८ (२) अनुसार मुख्यमन्त्री कँडेलले विश्वासको मत प्राप्त गरेका हुन् । उनको विपक्षमा जम्मा १४ मत खसेको थियो ।
गत साउन ७ गते नेकपा (माओवादी केन्द्र) ले समर्थन फिर्ता लिएपछि मुख्यमन्त्री कँडेलले दोस्रो पटक विश्वासको मत लिएका हुन् । २०८० चैत २७ गते मुख्यमन्त्री नियुक्त भएका कँडेलले वैशाख १४ गते पहिलो पटक विश्वासको मत लिएका थिए ।
संघमा सत्ता समीकरण फेरिएसँगै कर्णालीमा पनि एमाले र नेपाली कांग्रेसबीच सत्ता साझेदारी भएको हो ।
४० सदस्यीय कर्णाली प्रदेश सभामा हाल कांग्रेसका १३ जना सांसद छन् ।
सरकारको नेतृत्व गरिरहेको एमालेका सभामुखसहित १० सांसद छन् ।
राप्रपा र नेकपा (एकीकृत समाजवादी) का एक-एक जना सांसद छन् । एक जना स्वतन्त्र सांसद छन् ।
