काठमाडौं । दसैँ, तिहार र छठ पर्वलाई लक्षित गर्दै काठमाडौं प्रहरीले विशेष सुरक्षा योजना लागू गरेको छ । चाडपर्वका समयमा हुने सम्भावित चोरी, लुटपाट, ठगी तथा अन्य आपराधिक गतिविधि नियन्त्रणका लागि ३ हजार ५०६ प्रहरी परिचालन गरिने भएको छ ।
जिल्ला प्रहरी परिसर काठमाडौंका अनुसार भीडभाड हुने बजार, धार्मिक स्थल, यातायात केन्द्र, बैंक तथा एटीएम र सुनचाँदी पसलमा सुरक्षा निगरानी बढाइनेछ। घटना भएको ५ देखि १० मिनेटभित्र घटनास्थल पुग्ने गरी प्रहरी परिचालनको व्यवस्था मिलाइएको छ ।
प्रहरी उपरीक्षक दानबहादुर थापाका अनुसार आवश्यकताअनुसार थप १९० प्रहरीसमेत परिचालन गर्न सकिनेछ । बर्दीधारीसँगै सादा पोशाकका प्रहरीलाई समेत विभिन्न २२ प्रकारका ड्युटीमा खटाइनेछ ।
न्यूरोड, असन, कोटेश्वर, कलंकी, गोंगबु, गौशाला, पशुपतिनाथ, गुह्येश्वरी, दक्षिणकालीलगायतका क्षेत्रमा विशेष निगरानी गरिनेछ । कलंकी, कोटेश्वर, गौशाला, गोंगबु बसपार्क, बल्खु, नागढुंगा, बालाजु, सितापाइला र जोरपाटीलगायत स्थानमा सहायता कक्ष स्थापना गरिने प्रहरीले जनाएको छ ।
सुरक्षाका लागि मोबाइल तथा पैदल गस्ती, क्यूआरटी, चेकपोइन्ट, संयुक्त चेकिङ र रात्री गस्ती सञ्चालन गरिनेछ । काठमाडौंमा रहेका १ हजार २४२ सीसीटीभी, तीन ड्रोन, के–९ टोली तथा सामाजिक सञ्जाल मनिटरिङ डेस्कमार्फत समेत निगरानी गरिनेछ ।
जुवा, लंगुरबुर्जा, नक्कली टिकट तथा ठगी, मदिरा सेवनपछि हुने झैझगडा, सवारी दुर्घटना, घरमा चोरी तथा पटका–आतसबाजीबाट हुनसक्ने आगलागीलाई प्रहरीले चाडपर्वका प्रमुख सुरक्षा चुनौतीका रूपमा लिएको छ ।
विशेष सुरक्षा योजना असोज १६ देखि कात्तिक ३० गतेसम्म लागू हुनेछ । प्रहरीले शंकास्पद गतिविधि देखिएमा तत्काल १०० नम्बरमा जानकारी दिन सर्वसाधारणलाई आग्रह गरेको छ ।
