काठमाडौं । निरन्तरको वर्षा र प्रतिकूल मौसमका कारण देशका विभिन्न विमानस्थलबाट हुने आन्तरिक हवाई उडान प्रभावित भएका छन् । कमजोर भिजिबिलिटीका कारण पोखरा, भरतपुर र तुम्लिङटारलगायत विमानस्थलमा उडान तथा अवतरणमा समस्या देखिएको हो ।
बुद्ध एयरका सूचना अधिकारी दीपेन्द्र कर्णका अनुसार पोखरा, भरतपुर र तुम्लिङटारमा भिजिबिलिटी कम हुँदा उडान प्रभावित भएको छ । तुम्लिङटारका लागि निर्धारित बुद्ध एयरको उडान रद्द भएको छ भने भरतपुरतर्फका तीनवटा उडानसमेत रद्द भएका छन् । मौसमका कारण माउन्टेन फ्लाइट पनि स्थगित गरिएको छ ।
यस्तै, पोखरा विमानस्थलमा मौसम अनुकूल हुने प्रतीक्षामा केही उडान ढिला भएका छन् । यती एयरलाइन्सले पनि प्रतिकूल मौसमका कारण उडान ढिलाइ तथा समय परिवर्तन हुनसक्ने जनाएको छ। एयरलाइन्सले यात्रुलाई विमानस्थलतर्फ जानुअघि वेबसाइट वा मोबाइल एपमार्फत उडानको पछिल्लो अवस्था जाँच गर्न आग्रह गरेको छ ।
आन्तरिक उडान प्रभावित हुँदा त्रिभुवन अन्तर्राष्ट्रिय विमानस्थलमा यात्रुको चाप बढेको छ । यद्यपि, अन्य गन्तव्यतर्फका अधिकांश आन्तरिक उडान सामान्य रूपमा सञ्चालन भइरहेका छन् । अन्तर्राष्ट्रिय उडानतर्फ भने हालसम्म उल्लेखनीय समस्या नरहेको विमानस्थल कार्यालयले जनाएको छ ।
