काठमाडौं । रसुवामा निर्माणाधीन माथिल्लो त्रिशूली–१ जलविद्युत् आयोजनाको टनेलबाट आज थप ११ वटा शव फेला परेका छन् ।
नेपाली सेनाका अनुसार जालीमा अल्झिएको तथा हिलोमा दबिएको अवस्थामा ११ वटा शव फेला परेका हुन् । सेनाको टोलीले ती शव उद्धार गरी टनेलबाट बाहिर निकालेको जनाएको छ ।
गत भदौ १० गते रसुवाको भोटेकोशी नदीमा आएको विनाशकारी बाढीका कारण आयोजनाको टनेललगायत क्षेत्रमा क्षति पुगेको थियो । बाढीपछि सम्पर्कविहीन भएकाहरूको खोजी तथा उद्धार कार्य जारी छ ।
नेपाली सेनाले माथिल्लो त्रिशूली–१ को टनेलमा थप खोजी कार्य जारी रहेको जनाएको छ।
