काठमाडौं । रसुवाको भोटेकोशी नदीमा आएको भीषण बाढीपछि बेपत्ता भएका नेपाली तथा विदेशी नागरिकको शव वा शरीरका अंग पहिचान गर्न सरकारले डीएनए परीक्षणको व्यवस्था गरेको छ । बाढीपछि फेला परेका शव तथा शरीरका अंगको डीएनए प्रोफाइल बेपत्ता व्यक्तिका आफन्तको डीएनएसँग तुलना गरी पहिचान सुनिश्चित गर्ने उद्देश्यले प्रक्रिया अघि बढाइएको हो ।
प्रहरीका अनुसार नेपालमा रहेका बेपत्ता व्यक्तिका नजिकका रक्तसम्बन्धी आफन्तमध्ये बाबु, आमा, छोरा वा छोरीमध्ये कुनै एक जनाले डीएनए परीक्षणका लागि नमुना दिन सक्नेछन् । त्यसका लागि सम्बन्धित व्यक्तिको फ्रेस ब्लड स्याम्पल र दुई प्रति पासपोर्ट साइजको फोटो आवश्यक पर्नेछ ।
नमुना दिन चाहने आफन्तले महाराजगञ्जस्थित नेपाल प्रहरी अस्पतालको ल्याब वा आफूलाई पायक पर्ने नजिकैको जिल्ला प्रहरी कार्यालयमा सम्पर्क गर्न प्रहरीले अनुरोध गरेको छ ।
त्यस्तै, बेपत्ता व्यक्तिका आफन्त विदेशमा रहेको अवस्थामा उनीहरूले सम्बन्धित देशमै डीएनए प्रोफाइलिङ गराएर त्यसको सफ्टकपी नेपाल पठाउन सक्ने व्यवस्था गरिएको छ । विदेशमा रहेका आफन्तमध्ये पनि बाबु, आमा, छोरा वा छोरीमध्ये कुनै एक जनाको डीएनए प्रोफाइलिङ गराउन सकिने प्रहरीले जनाएको छ ।
विदेशमा गरिएको डीएनए प्रोफाइलिङको सफ्टकपी नेपाल प्रहरीको आधिकारिक इमेल dnacodis@nepalpolice.gov.np मा पठाउन अनुरोध गरिएको छ ।
बाढीपछि फेला परेका कतिपय शव तथा शरीरका अंग पहिचान गर्न कठिनाइ भइरहेका बेला आफन्तबाट संकलन गरिएको डीएनए नमुनालाई फेला परेका शवको नमुनासँग तुलना गरी पहिचान गर्ने प्रक्रिया अघि बढाइनेछ ।
प्रहरीका अनुसार बाढीमा परी ९०० भन्दा बढीको शव फेला परिसकेको छ भने ४ हजारभन्दा बढी व्यक्ति अझै बेपत्ता छन् । बेपत्ताको संख्या ठूलो रहेकाले फेला परेका शव तथा शरीरका अंगको पहिचानका लागि डीएनए परीक्षणलाई महत्वपूर्ण माध्यमका रूपमा अघि बढाइएको हो ।
