काठमाडौं । भारतीय सेना प्रमुख धिरज सेठ पहिलो विदेश भ्रमणका क्रममा काठमाडौं आइपुगेका छन् । पाँच सदस्यीय प्रतिनिधि मण्डलको नेतृत्व गर्दै सेठ आइतबार साँझ काठमाडौं आइपुगेका हुन्।
भारतीय सेना प्रमुख सेठलाई नेपाल भ्रमणका क्रममा सोमबार नेपाली सेनाको मानार्थ प्रधानसेनापतिको दर्जा दिइने बताइएको छ। नेपाल र भारतमा सेना प्रमुख नियुक्त भएपछि एकले अर्को देशमा भ्रमण गर्ने र मानार्थ महारथीको दर्जा दिने प्रचलन अनुसार सेठलाई सो उपाधि दिन लागिएको हो।
नेपाली सेनाका प्रधानसेनापति अशोकराज सिग्देललाई पनि नयाँ दिल्लीस्थित राष्ट्रपति भवनमा एक विशेष समारोहका बीच राष्ट्रपति द्रौपदी मुर्मुले भारतीय सेनाको मानार्थ महारथी दर्जा दिएकी थिइन्। स्रोतका अनुसार नेपाल भ्रमणको क्रममा सेठले रक्षामन्त्रीको समेत जिम्मेवारी सम्हालेका प्रधानमन्त्री बालेन शाह, प्रधानसेनापति अशोकराज सिग्देल लगायतसँग भेटवार्तासमेत गर्ने छन् ।
शाह प्रधानमन्त्री बनेपछि भारतबाट उच्चस्तरीय भ्रमणमा आउने सेठ सबैभन्दा उच्च अधिकारी हुन्। राष्ट्रपति रामचन्द्र पौडेलले सोमबार शीतलनिवासमा आयोजित विशेष समारोहमा सेठलाई नेपाली सेनाको मानार्थ महारथीको दर्जा प्रदान गर्ने कार्यक्रम छ।
