भक्तपुर । सूर्यविनायक नगरपालिका–८ ले वडावासीका सुख र दुःखका क्षणमा साथ दिने उद्देश्यसहित ‘सुख–दुःखको साथ’ कार्यक्रम शुरू गरेको छ । वडा कार्यालयले सोमवार एक सूचना जारी गर्दै वडाभित्रका संवेदनशील परिवारलाई राहत तथा सहयोग उपलब्ध गराउने उद्देश्यले कार्यक्रम लागू गरिएको जनाएको हो ।
कार्यक्रमअन्तर्गत वडा नं। ८ भित्र कुनै पनि परिवारका सदस्यको मृत्यु भएमा अन्त्येष्टि तथा अन्य आवश्यक कार्यका लागि सम्बन्धित परिवारलाई १० हजार नगद सहयोग प्रदान गरिने वडाअध्यक्ष पुष्पराज बस्नेतले बताए । वडाअध्यक्ष बस्नेतका अनुसार, सुत्केरी आमा र नवजात शिशुको स्वास्थ्य तथा पोषणलाई ध्यानमा राख्दै आमालाई २ हजार ५०० बराबरको पोषण सामग्री तथा नवजात शिशुलाई २ हजार ५०० बराबरका नयाँ कपडा उपलब्ध गराइने छ ।
यो सुविधा प्राप्त गर्न लाभग्राही वडा नं। ८ को स्थायी बासिन्दा हुनुपर्ने वा वडाभित्र बसाइँसराइ गरी आएको हकमा बसाइँसराइ दर्ता भएको हुनुपर्ने सूचनामा उल्लेख छ । साथै, जन्म वा मृत्यु भएको ३५ दिनभित्र वडा कार्यालयमा घटना दर्ता गरिसकेको हुनुपर्ने व्यवस्था गरिएको छ ।
वडाअध्यक्ष बस्नेतले यस कार्यक्रमले नागरिकका जीवनका महत्वपूर्ण क्षणमा स्थानीय सरकारलाई अझ नजिक ल्याउने विश्वास व्यक्त गरे । थप जानकारी तथा सहयोगका लागि वडा कार्यालय वा वडाका जनप्रतिनिधिसँग सम्पर्क गर्न सूचनामा अनुरोध गरिएको छ ।
