भक्तपुर । नयाँ वर्ष २०८२ तथा भक्तपुरको ऐतिहासिक विस्काः जात्राको अवसर पारेर भक्तपुरमा नवौं भक्तपुर औद्योगिक, साँस्कृतिक, पर्यटन, कृषि तथा व्यापार महोत्सव २०८१–०८२ आयोजना हुने भएको छ । औद्योगिक शान्ति नेपाल संस्था र मध्यपुर ब्वाईज व्याण्डको संयुक्त आयोजनामा महोत्सव आगामी चैत २८ गतेदेखि बैशाख ७ गतेसम्म भक्तपुरको सल्लाघारीस्थित तीनकुने खुला चौरमा सञ्चालन गरिने छ ।
आज विहिबार विहान आयोजना स्थल छेउको एक रेष्टुरेन्टमा आयोजित पत्रकार सम्मेलन मार्फत आयोजक पक्षले महोत्सव वारे जानकारी गराएको हो । औद्योगिक शान्ति नेपालका अध्यक्ष सन्दीप महत र महोत्सवका संयोजक दीपक थापाले महोत्सव वारे बिस्तृत जानकारी गराएका हुन् । पत्रकार सम्मेलनमा अध्यक्ष महतले मन्तब्य राखेका थिए भने महोत्सवका संयोजक दीपक थापाले प्रेस बिज्ञप्ती पढ्नुका साथै पत्रकारका तमाम जिज्ञासाको जवाफ दिएका थिए ।
यस महोत्सवमा दैनिक उपभोग्य वस्तुहरू, खाद्य सामग्री, लत्ताकपडा, जुत्ता, कृषि तथा हस्तकलाका सामग्रीहरू बिक्रीका लागि राखिने आयोजक संस्थाले जनाएको छ । साथै, औद्योगिक उत्पादन, सूचना प्रविधि, अटोमोबाइल तथा आधुनिक कृषि औजारको प्रदर्शनीसमेत गरिनेछ । मोबाइल तथा इलेक्ट्रोनिक्स सामानका विशेष स्टलहरू समेत महोत्सवमा रहनेछन् ।
महोत्सवमा बालबालिकाहरूका लागि बाल उद्यान, ड्रागन ब्रेक डान्स, विभिन्न खेलौना स्थल, रोटे पिङ, रेनजर तथा मारुती सर्कस जस्ता मनोरञ्जनात्मक कार्यक्रमहरू समावेश गरिनेछन् । त्यस्तै, स्थानीय खाद्य परिकार, पर्यटकीय गतिविधि, तथा राष्ट्रिय कलाकारहरूको सांगीतिक प्रस्तुति महोत्सवको मुख्य आकर्षण हुने पनि पत्रकार सम्मेलनमा जानकारी गराईयो ।
व्यापारिक स्टलहरूमा २० देखि ५० प्रतिशतसम्म छुटको व्यवस्था गरिएको छ । यस वर्ष महोत्सवमा करिब १ सय ५० स्टल रहने र पाँच लाखभन्दा बढी अवलोकनकर्ताको अपेक्षा गरिएको छ । महोत्सवलाई व्यवस्थित गर्नका लागि प्रवेश शुल्क रु. ५० र रु. ८० तोकिएको छ भने विद्यार्थीलाई विशेष छुटको व्यवस्था गरिएको छ । त्यसैगरी जेष्ठ नागरिकलाई मेला अवलोकन निशुल्क गरिएको छ ।
साथै, बैशाख १३ गते चर्चित गायक–गायिकाहरूको प्रस्तुति रहने ‘भक्तपुर सांगीतिक साँझ–२०८२’ को समेत आयोजना गरिने जानकारी पनि आयोजक संस्थाले दिएको छ । आयोजकहरूले विगतका वर्षझैं यसपटक पनि सञ्चारकर्मी तथा आम नागरिकको सक्रिय सहभागिता एवं सहयोगको अपेक्षा गरेका छन् । पत्रकार सम्मेलनको सञ्चालन पत्रकार हेमराज ढकालले गरेका थिए । स्मरण रहोस् यस अघिका सम्पूर्ण महोत्सव शृङखला बृहत्त र सफल भएका थिए ।
