काठमाडौं । थाइल्यान्डको राजधानी बैंककमा रहेको ६ तले होटलमा आगलागी हुँदा ३ विदेशी पर्यटकको मृत्यु भएको छ । ७ जना घाइते भएका छन् ।
मृत्यु हुनेमा अमेरिका, ब्राजिल र युक्रेनका नागरिक छन् । उनीहरूमध्ये एक महिला र दुई पुरुष छन् । आगलागीमा परेर गम्भीर घाइते भएका उनीहरूको अस्पतालमा उपचारको क्रममा ज्यान गएको हो ।
घाइतेमध्ये पाँच विदेशी र दुई थाइ नागरिक रहेको जनाइएको छ। आगलागीलगत्तै पुगेका उद्धारकर्ताले होटलमा रहेका अन्य ७५ जनालाई उद्धार गरेका थिए ।
बैंककका गभर्नर चाडचार्ट सिटिपन्टका अनुसार अग्निनियन्त्रकहरू सूचना पाएको पाँच मिनेटभित्रै घटनास्थलमा पुगेको र तीनवटा क्रेनको सहायतामा उद्धारकर्मीले करिब ७५ जनालाई उद्धार गरेको जानकारी दिए ।
